"1-Mart" sözünə uyğun 1558 nəticə tapıldı!

Erməni əsgərin ölüm faktı gizlədilib, başqa bir şəxs qatil təyin edilib – ƏTRAFLI

2019/10/73003-1572246672.jpg
Oxunub: 790     20:10     29 Oktyabr 2019    
Ermənistanın Sünik vilayət ümumi yurisdiksiya məhkəməsinin Xankəndi bölümündə Gümrü sakini olan hərbi qulluqçu, əsgər Karen Karapetyanın qətli üzrə cinayət işinin məhkəmə prosesi keçiriləcək.

Ordu.az erməni KİV-lərinə istinadən xəbər verir ki, məhkəmə noyabrın 19-a təyin olunub.

Qətl hadisəsi bu il martın 12-si saat 06:50 radələrində, işğal altında olan Madagizdə dislokasiya olunan 33651 nömrəli, 6-cı dağ atıcı alayda baş verib. Cinayət materiallarındakı bir çox faktlar istintaq qrupunun saxta araşdırma apardığını və əsl təqsirkarları gizlətdiyini iddia etməyə əsas verir.

Beləliklə, təqsirkar kürsüsündə Karapetyanın əsgər yoldaşı Artyom Qriqoryandır. Ona qarşı avtomat silahdan ehtiyatsızlıq edərək adam öldürmə maddəsi üzrə cinayət işi açılıb. Manqanın sürücüsü olan Qriqoryan avtomatıın lüləsini Karapetyana doğru tuşlayaraq, zarafatla tətiyi çəkib.

Müstəntiqlərin sözlərinə görə, Karapetyan zarafatla açılan atəş nəticəsində çənəsinin sol yuxarı əzələ hissəsi və döş qəfəsi nahiyəsində dəlib keçən odlu silah yarası xəsarəti alaraq ölüb.

İttiham edilən tərəfin müdafiəçisi Boris Baxşiyandır.

Karapetyanın ailə üzvləri zarafatla atəş etmə iddiasına inanmırlar. Ölən hərbi qulluqçunun valideynləri müstəntiqlərin qatil Artyom Qriqoryana qarşı açılan cinayət maddəsinin dəyişdirilməsinə də şübhə ilə yanaşırlar. Əvvəlcə cinayət işində xuliqanlıq motivləri əsasında qətl maddəsi ilə istintaq aparılsa da, cəmi 5 ay sonra cinayət işinin istintaqının gedişatı dəyişdirilərək daha yumşaq maddə, yəni silahla davranış qaydalarının pozulması maddəsi tətbiq edilib.

Müstəntiqlər tanışlıq üçün yekun ittiham rəyini, ölən hərbçinin hüquqi varisi hesab edilən anası Şahane Karapetyana cinayət işi məhkəməyə daxil olduqdan sonra veriblər.

Ölən hərbi qulluqçunun anasının xahişi ilə “İnsan haqları naminə jurnalistlər” ictimai birliyinin üzvləri və ekspert hüquq müdafiəçisi Ruben Martirosyan cinayət materialları ilə tanış olub və bir sıra əhəmiyyətli nöqsanlar aşkar edib.

Cinayət işinin təfərrüatlarını təsvir edərkən müstəntiq yazır ki, Artyom ona təhkim edilən avtomat silahdan Karenə çoxsaylı atəş açması nəticəsində onu öldürüb. Lakin sonrakı bütün yazışmalarda isə çox saylı atəş yox, sadəcə atəş açılmasını yazır. Şüurlu şəkildə qətlə yetirildiyinə əsas verə biləcək çoxsaylı atəş açma halının, niyə atəş açılmasına çevrilməsi suallar doğurur.

Karenlə Artyom arasında silahın tuşlanmamasına dair zarafatlaşması və nəticədə açılan atəşlə ölüm halının baş verməsi, məhkəmə tibbi ekspertizasının verdiyi rəylə təkzib edilir. Ekspertizanın rəyinə görə, atəş 75 sm məsafədən açılıb. Elə həmin rəydə göstərilir ki, Karen Karapetyanın cəsədində küt alətlə vurulan xəsarətlərin, zorakılıq əlamətlərinin izi olub. Bu xəsarətlərin ölümündən 3-5 gün öncə törədilə biləcəyi və həmin an törədilənlərin də olduğu barədə ehtimallar var.

Ekspertizanın rəyinə əsasən, yalnız Qriqoryanın deyil, həm də Karapetyanın silahından atəş açılıb. Lakin ibtidai istintaq bu məqama diqqət yetirməyib.

Zirehli jiletinin düymələri, hərbi üst geyimin düymələrinin qopmuş olması, sağ tərəfinin isə cırılması onun qətlə yetirilməzdən əvvəl dava etdiyini sübut edir. Amma müstəntiqlər bunu da gözardına vurublar. Müstəntiqlər geyimləri heç ekspertizaya belə göndərməyiblər.

Döyüş postunda eyni vaxtda 9 əsgər xidmət edir. Onlardan biri öldürülüb. Müstəntiqlər bu əsgərlərin hadisə yerində olub-olmadığını müəyyən etmək üçün analiz nümunələri götürməli idi. Ancaq buna da əməl olunmayıb. Əsgərlərin bədəninə baxış keçirilərkən 8 əsgərdən altısında 3-5 gün öncədən 13 gün müddətinədək yetirildiyi bədən xəsarətləri izləri aşkarlanıb.

Hadisənin baş verdiyi yerin dəyişdirildiyi də istisna edilmir. Müstəntiq postda eyni vaxtda növbə aparan digər bir şahid, əsgər Vahe Karapetyanın hadisə yerində olması faktını gizlədib. Onun ifadəsi alınmayıb. Postdan çıxarılan kameranın hara yox olması barədə bu kameralarla işləyən operatorların ifadəsi alınmayıb.

Müstəntiq Qriqoryanın hərbi hissədə “avtoritet” olub-olmadığına dair əsgərlərdən ifadə alıb. Verilən ifadələrdə qeyd edilib ki, Qriqoryan ərazini süpürən, qabları yuyan biridir. Aydındır ki, o, hərbi hissənin ən təzyiq altında olan, ən müdafiəsiz əsgərlərindən biridir. Belə adamlarla sövdələşmək adətən rahat olur.

“Əminliklə deyə bilərəm ki, Qriqoryanı qatil təyin ediblər” , - deyə ekspert Ruben Martirosyan bildirib. O, müstəntiqlərin yol verdiyi cinayət əməlləri barədə aidiyyəti qurumlara məlumat verəcəyini bildirib.

Alpər Mövludoğlu
Ordu.az

© Materiallardan istifadə edərkən hiperlinklə istinad olunmalıdır


Teqlər: Ermənistan-ordusu   Ölüm   Cinayət