"Əfqanıstan" sözünə uyğun 1585 nəticə tapıldı!

MSN müəssisələrində kütləvi istehsal edilən AZ 7.62 tüfəngləri - HƏRBİ ESKPERT

2019/11/IMG_0-1572683643.jpg
Oxunub: 2297     15:38     20 Noyabr 2019    
İlk avtomatik tüfənglər SSRİ-nin İjmaş zavodunda konstruktor Mixail Kalaşnikovun iştirakı hazırlanıb və 1949-cu ildə AK-47 (“Kalaşnikov” avtomatı 47-ci il istehsalı) adı ilə SSRİ silahlanmasına qəbul edilib. Zamanına görə kifayət qədər sadə və dözümlü bir silah olub. 7.62 mm çaplı AK tüfəngləri isə 1960-cı ildən hazırlanmağa başlayıb.

Geniş yayılan AK tüfənglərinin dünyada ümumi sayı 100 milyondan çox olduğu iddia edilir. "Foreign Policy" jurnalına görə, ABŞ-da 70-350 dollar arasında qiyməti dəyişən AK silahlarını ən ucuz Əfqanıstanın qara bazarından almaq mümkündür. Orada 10 dolları və ya 1 ədəd toyuğu avtomat ilə dəyşmək bu gün də adi haldır.


Düşmənin canlı qüvvəsini məhv etmək üçün nəzərədə tutulan avtomatik tüfəng dünyanın bir çox ölkələrində, xüsusən də keçmiş Varşava Paktı dövlətlərininin bəzilərində, zəif inkişaf edən ərəb ölkələrində, SSRİ-nin parçalanması nəticəsində yaranan postsovet ölkələri tərəfindən istifadə edilir. Dünyanın irimiqyaslı müharibə, lokal münaqişə və ya vətəndaş qarşıdurmalarının baş verdiyi bütün ərazilərində bu silahların çoxsaylı modifikasiyalarına rast gəlinir. Demək olar ki, dünyanın bütün terror qruplaşmalarında bu silahların müxtəlif modellərindən geniş istifadə edilir.

SSRİ-nin süqutu ilə Ermənistan tərəfindən təcavüzə məruz qalan Azərbaycan bu silahları sovet ordusundan leqal və ya qeyri-leqal yollarla əldə etmək məcburiyyətində qaldı. Uzun illər boyu aktiv istifadə olunan silahların resurslarının bitməsi, 2005-ci ildə yaradılan Müdafiə Sənayesi Nazirliyini bu tələbatı qarşılamaq üçün müəyyən addımlar atmağa vadar etdi. 2018-ci ilin sonunda Azərbaycan müdafiə sənayesi nazirinin müavini Yəhya Musayev tabeliklərində olan müəssisələrin birində AZ 7.62 və EM-14 avtomatlarının istehsalat hazırlığının artıq başa çatdığını və 2019-cu ildən onların seriyalı istehsalına başlanılacağı barədə məlumat verdi. Hazırda bu silahlar MSN-in müəssisələrində kütləvi şəkildə istehsal olunur.


MSN-nin 2016 və 2018-ci ildə Bakıda keçirilən ADEX sərgilərində iştirakçılara təqdim etdiyi kataloqlara baxdıqda yerli mühəndislərimizin AZ 7.62 silahlarının istehsalında bir sıra yeniliklərə imza atdığı diqqəti cəlb edir.

Yerli tüfəng qatlanan erqonomik qundağa sahibdir. Qundağın, xəzinənin və lülə yatağının sərt plastikdən hazırlanması ilə tüfəngin kütləsinin azaldılmasına, davamlılığının isə artmasına nail olunub. Metal hissələr paslanma əleyhinə xüsusi boya ilə örtülüb. Silah lüləsinin alt hissəsinə qumbaraatan qurğu, uc hissəsinə isə süngü-bıçaq quraşdırmaq mümkündür.

Silahın üstündə və yan tərəflərində müxtəlif gecə görmə və optik cihazlar quraşdırmaq üçün lövhələr yerləşdirilib.


Taktiki-Texniki Xüsusiyyətləri

Silahın boş kütləsi - 3.06 kg
Silahın dolu xəzinə və süngü-bıçaqla kütləsi - 4.1 kg
Tam uzunluğu - 943 mm
Kompakt uzunluğu - 705 mm
Lülə uzunluğu - 415 mm
Mərmisi - 7.62x39 mm


Atəş tezliyi

Avtomatik rejimdə - 600 atəş/dəqiqə
Tək-tək rejimdə - 40 ədəd
Güllənin başlanğıc sürəti - 900 m/s
Effektiv məsafə - 100-1000 m (nişangahın nizamlanmasına bağlı olaraq)
Xəzinə - 30 mərmi
Silahda nizamlana bilən mexaniki nişangahdan istifadə edilir



Tüfəng aşağıdakı əsas hissələrdən ibarətdir:

lülə,
lülə qutusu və nişangah mexanizmi ilə birlikdə qundaq,
lülə qutusunun qapağı,
qaytarıcı mexanizm,
qaz porşeni ilə birlikdə çaxmaq çərçivəsi,
çaxmaq,
zərbə tətik mexanizmi,
qaz borusu,
lülə yatağı,
daraq,
süngü-bıçaq.


AZ 7.62 tüfənginin iş prinsipi atəş zamanı əmələ gələn barıt qazlarının enerjisinin istifadəsinə əsaslanır. Atəş zamanı barıt qazlarının bir hissəsi güllənin ardınca hərəkət edərək, lülə divarındakı dəlikdən qaz borucuğuna keçərək qaz porşeninə təzyiq göstərir və çaxmaq çərçivəsini qaz porşeni ilə birlikdə geriyə itələyir. Çaxmaq çərçivəsi geri çəkilərkən çaxmaq sıxılıraq gilizi çölə atır, yerinə qayıtdıqda isə növbəti mərmini xəzinədən lülə kanalına ötürür.

Hərbi ekspert Ədalət Verdiyev
Ordu.az

© Materiallardan istifadə edərkən hiperlinklə istinad olunmalıdır


Teqlər: