Ordu.az xəbər verir ki, Geelonq şəhərində yerləşən istehsal xəttində hazırlanan yerli platforma təkmilləşdirilmiş zirehli konstruksiyası və avtomatik nişanalma sistemi sayəsində mövqeyə daxil olduqdan dərhal sonra atəş açmaq imkanı təqdim edir.
Məlumata görə, AS9 “Huntsman” sisteminin ilk canlı atışları Avstraliyanın müdafiə sənayesi və ordusu üçün mühüm mərhələ hesab olunur. Platforma heyətin əlavə əl ilə quraşdırma işləri aparmasına ehtiyac yaratmadan qısa müddətdə döyüşə hazır vəziyyətə gəlir.
Sınaqlar çərçivəsində Kral Avstraliya Artilleriyasının 4-cü alayından olan 30 artilleriyaçı altı həftə davam edən intensiv hazırlıq kursunda iştirak edib. Geelonq istehsalı olan döyüş maşınlarının hərbi hissələrə təhvil verilməsindən qısa müddət sonra canlı atış mərhələsinə keçilməsi müdafiə sənayesi ilə ordu arasında əməkdaşlığın uğurlu nəticəsi kimi qiymətləndirilib.
Sistemlər və İnteqrasiya üzrə baş direktor, briqada generalı Ceyms Devis bildirib ki, Avstraliyada istehsal olunan bir sistemin qısa müddətdə hazırlanmış heyətlə döyüş atışları həyata keçirməsi mühüm nailiyyətdir.
Onun sözlərinə görə, bu proses Avstraliya Silahlı Qüvvələrinin yeni imkanları silahlanmaya daxil edərkən əldə etdiyi logistika və əməliyyat çevikliyinin göstəricisidir.
AS9 “Huntsman” ənənəvi yedəyə alınan artilleriya sistemlərinin yaratdığı əməliyyat yükünü azaltmağa yönəlmiş bir sıra xüsusiyyətlərə malikdir.
Sistemin əsas üstünlüklərindən biri sıfıra yaxın hazırlıq müddətidir. Tırtıllı hərəkət sistemi və qabaqcıl asqı qurğusu sayəsində platforma mövqeyə daxil olduqdan dərhal sonra atəş açmağa hazır vəziyyətə gəlir.
Bundan əlavə, nişançının daxil etdiyi koordinatlar avtomatik şəkildə emal olunur. Rəqəmsal idarəetmə ənənəvi artilleriya sistemlərində rast gəlinən hesablamalar və əl ilə istiqamətləndirmə zamanı yaranan səhvləri minimuma endirir.
AS9 “Huntsman”ın digər mühüm üstünlüyü “vur və çıx” imkanlarıdır. Yüksək hərəkət qabiliyyəti sayəsində sistem atəş tapşırığını yerinə yetirdikdən sonra düşmənin cavab zərbəsinə məruz qalmadan sürətlə mövqeyini dəyişə bilir.
Artilleriya Məktəbinin komandanı, polkovnik-leytenant Kris D-Aquino bildirib ki, yeni sistem artilleriya qüvvələrinin atəş gücündən istifadə üsulunu dəyişir.
Onun sözlərinə görə, AS9 əvvəlki sistemlərlə müqayisədə daha yaxşı qorunur, daha çevikdir və yüksək manevr imkanlarına malikdir. Komandir qeyd edib ki, əsas məqsəd şəxsi heyətin yeni texnologiyaya etibarını artırmaq və sistemi real şəraitdə maksimum imkanları ilə sınaqdan keçirməkdir.
Təlimlərdə iştirak edən hərbçilər üçün canlı atış mərhələsi həftələrlə davam edən nəzəri hazırlığın praktiki yoxlanışı olub.
İki ildir yedəyə alınan artilleriya bölməsində xidmət edən əsgər Maksvell Klial bildirib ki, sistemin istifadəsi əvvəlki platformalarla müqayisədə tamamilə fərqlidir.
Onun sözlərinə görə, nişançı bütün məlumatları sistemə daxil etdikdən sonra bir düymə vasitəsilə top avtomatik şəkildə hədəfə yönəlir. Əvvəllər istifadə olunan M777 sistemlərində tələb olunan əl ilə hazırlıq işlərinə artıq ehtiyac qalmır.
Klial qeyd edib ki, yeni sistem sayəsində heyət bütün diqqətini birbaşa hədəfə yönəldə bilir və bu, artilleriya fəaliyyətinə yeni yanaşma formalaşdırır.
Ekspertlər hesab edirlər ki, AS9 “Huntsman” yalnız yeni silah sistemi deyil, həm də Avstraliyanın müdafiə sənayesində əldə etdiyi müstəqillik və texnoloji inkişaf strategiyasının mühüm göstəricisidir.
Sevinc Əliyeva
Ordu.az
