Bakıda Rusiya-Azərbaycan Ekspert Şurasının 5-ci iclası keçirilir

2024/06/trend-1718978380.jpg
Oxunub: 252     17:25     21 İyun 2024    
Bakıda Rusiya-Azərbaycan Ekspert Şurasının 5-ci iclası keçirilir.

Ordu.az xəbər verir ki, iclasın açılışını Beynəlxalq Münasibətlərin Təhlili Mərkəzinin İdarə Heyətinin rəhbəri Fərid Şəfiyev edib.

O bildirib ki, bu danışıqlar platforması 2021-ci ildə yaradılıb və görüşlər həm Moskvada, həm də Bakıda keçirilib.

"Rusiya Federasiyası ilə əməkdaşlığımız təkcə ikitərəfli xarakter daşımır. Təsadüfi deyil ki, bugünkü tədbirin mövzusu çoxtərəfli layihələr və təşəbbüslər çərçivəsində əməkdaşlıqdır. Biz həm regional təhlükəsizlik məsələlərini, həm də bir sıra logistika və nəqliyyat məsələlərini həll edəcəyik", Fərid Şəfiyev deyib.

O qeyd edib ki, tədbirdə iki ölkənin aparıcı ekspertləri bir araya gəlib və KİV-də müəyyən hadisələrlə bağlı onların ekspert qiymətləndirmələrinin daha tez-tez verilməsi məqsədəuyğundur.

Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Bakıda keçirilən Rusiya-Azərbaycan Ekspert Şurasının 5-ci iclasında deyib ki, Azərbaycan ilə Rusiya arasında münasibətlər bu gün ən yüksək səviyyədədir və buna 2022-ci ilin fevralında imzalanmış Müttəfiq Əməkdaşlıq haqqında Bəyannamə kömək edir.

"Bu gün Azərbaycanla Rusiya arasında münasibətlər ən yüksək səviyyədədir. Ortaq mədəniyyət, tarix və qarşılıqlı hörmət onların inkişafına kömək edib", - o deyib

Hacıyevin sözlərinə görə, iki ölkə arasında bütün sahələrdə ikitərəfli əlaqələrlə yanaşı, regionlararası əməkdaşlıq da genişlənir.

"Azərbaycan Rusiya Federasiyasının 70-dən çox subyekti ilə əlaqələr saxlayır, Rusiyanın regionları ilə azərbaycanlı tərəfdaşlar arasında ticarət-iqtisadi, elmi-texniki, mədəni əlaqələrə dair 10-dan çox saziş mövcuddur", - Hikmət Hacıyev vurğulayıb.

O qeyd edib ki, dünyada "nəqliyyat arteriya"larına təcili tələbat var.

"Azərbaycan Avrasiyanın müxtəlif nəqliyyat təşəbbüslərinin iştirakçısıdır. Belə ki, ITC (Beynəlxalq Nəqliyyat Dəhlizi) Şimal-Cənub xəttinin genişləndirilməsi istiqamətində işlər aparılır. Azərbaycan bu logistik strukturun inkişafına fəal şəkildə investisiya yatırmaqda davam edir və dəhlizin Azərbaycan hissəsinin imkanları genişləndirilir. Şübhəsiz ki, bu, təkcə Azərbaycan və Rusiyanın deyil, bütün regionun xeyrinə olacaq", - Hacıyev deyib.

O qeyd edib ki, Azərbaycanda Moskva Dövlət Universitetinin və tibb universitetinin filialları fəaliyyət göstərdiyindən, 300-dən çox məktəbdə tədris rus dilində aparıldığı üçün təhsil məsələlərində də mütərəqqi əməkdaşlıq inkişaf edir.

O həmçinin vurğulayıb ki, iki ölkə arasında ikitərəfli və çoxtərəfli münasibətlərin uzun tarixi var və onların gələcək inkişafında ekspert şurasının rolu çox vacibdir.

Daha sonra Xarici İşlər Nazirliyinin xüsusi tapşırıqlar üzrə səfiri Elşad İsgəndərov Bakıda Rusiya-Azərbaycan Ekspert Şurasının 5-ci iclasında çıxında vurğulayıb ki, Rusiya-Azərbaycan münasibətləri müsbət dinamika və proqnozlaşdırıla bilən inkişaf nümayiş etdirir.

O qeyd edib ki, hər iki dövlətin birgə regional səylərini istiqamətləndirən vektorlardan biri regional siyasi və iqtisadi əməkdaşlığın təmin edilməsinə və kənardan dağıdıcı müdaxilə cəhdlərinin məhdudlaşdırılmasına ümumi yanaşmalardır.

"Həm Azərbaycanın, həm də Rusiya Federasiyasının qəbul edilən qərarlarının suverenliyi lehinə aydın seçimi var", - İsgəndərov vurğulayıb.

Onun sözlərinə görə, Bakı tədbirinin keçirilməsi Rusiya-Azərbaycan münasibətlərinin yaxınlaşdırılması iradəsinin necə reallaşdığına bir nümunədir.

"Üç il əvvəl ekspert şurasının yaradılması ideyası ilk dəfə qaldırılanda biz bu təşəbbüsün əməli nəticələrinin olacağına əmin idik. Sevindirici haldır ki, qısa müddət ərzində ekspertlərimizin görüşdüyü platforma artıq beşinci iclasını keçirir", - diplomat əlavə edib.

Ordu.az

© Materiallardan istifadə edərkən hiperlinklə istinad olunmalıdır


Teqlər: Rusiya   Azərbaycan  


Bizi "telegram"da izləyin