Ordu.az xəbər verir ki, son illərdə Almaniya Hind-Sakit okean regionunda daha çox hərbi mövcudluq yaratmağa başlayıb.

Almaniya ordusunun komandanı Alfons Mais ilk alman qoşunlarının Avstraliyaya yola düşməsindən bir neçə saat əvvəl “Reuters”ə açıqlamasında bildirib ki, bu bölgə həm Almaniya, həm də Avropa İttifaqı (Aİ) üçün iqtisadi asılılıqlara görə son dərəcə vacib bir bölgədir.

Çin Berlinin ən mühüm ticarət tərəfdaşıdır və Avropanın xarici ticarətinin 40%-i Hind-Sakit okean regionunda regional mübahisələrin mərkəzi olan Cənubi Çin dənizindən keçir.

2021-ci ildə Almaniya hərbi gəmisi təxminən 20 ildən sonra ilk dəfə Cənubi Çin dənizində üzüb. Ötən il Berlin Avstraliyaya birgə təlimlərə 13 hərbi təyyarə göndərib ki, bu da hava qüvvələrinin sülh dövründəki ən böyük yerləşdirməsi olub.

Mais 170 paraşütçü və 40 dəniz piyadası da daxil olmaqla təxminən 240 Almaniya hərbi qulluqçusunun 22 iyul və 4 avqust tarixləri arasında Avstraliya və ABŞ arasında ildə iki dəfə keçirilən və ən böyük olan “Talisman Saber”də iştirak edəcəyini qeyd edib.

Almanlar İndoneziya, Yaponiya, Cənubi Koreya, Fransa və Böyük Britaniya kimi ölkələrin hərbi qulluqçuları ilə yanaşı, meşə müharibəsi və desant əməliyyatları üzrə təlim keçəcəklər.

Sevinc Əliyeva
Ordu.az