Həmin yük Quayakildən (Ekvador) Gürcüstanın Batumi limanı vasitəsilə Ermənistana gedirdi. Ermənistanın Dövlət Gəlirləri Komitəsi tələm-tələsik bəyan edib ki, yük Ermənistanda olmadığı üçün məsələ ilə bağlı heç nə deyə bilməz.
İtaliya Maliyyə Polisinin polkovnik-leytenantı Persando Danilo bildirib ki, o, Ermənistana ekzotik meyvələr gətirən şirkətin adını açıqlaya bilmir, çünki bu, məhkəməyə qədər sirdir: “Mən sizə şirkətin adını deyə bilmərəm, çünki istintaq davam edir. Biz sizin milli hakimiyyət orqanlarınızla da əlaqə saxlayırıq. Bircə onu deyə bilərəm ki, bu, şübhəsiz ki, Ermənistan üçün idi. Çünki konteynerlərdə kokainin yerinin araşdırılması bizə deyir ki, cinayətkar təşkilatın bu konteyneri götürə biləcəyi yeganə yer konteynerin son təyinat yerinə çatdığı yer idi. Erməni şirkətinin cinayətdə birbaşa iştirak edib-etmədiyini bilmirik. Təcrübə göstərir ki, bəzən şirkət rəhbərləri, işçilər, orta səviyyəli işçilər sahibinin xəbəri olmadan kokain qəbul edə bilirlər. Ona görə deyirəm ki, bu barədə daha çox araşdırma aparmalıyıq. Bəli, şübhəlilərimiz var, lakin daha çox məlumat əldə etmək üçün daha çox araşdırma aparmalıyıq. Bunun necə təşkil olunmasına şübhəmiz var, amma bu, ibtidai istintaq sirridir”.
Qeyd etmək lazımdır ki, 3 tona yaxın kokain adi narkotik alveri hadisəsi deyil. Bu, çox böyük partiyadır, Ermənistan üçün çox böyükdür. İtaliya tərəfi son nöqtənin Ermənistan olduğunu bildirsə də, ən azı yükün əhəmiyyətli hissəsi üçün Ermənistanın hələ də tranzit məntəqəsi kimi qəbul edildiyi istisna edilmir. Təbii ki, bu, sadəcə fərziyyədir, biz sadəcə çox böyük partiyadan danışırıq və onun Ermənistanda istehlak üçün nəzərdə tutula biləcəyini təsəvvür etmək çox çətindir. Tranzitin sonrakı mərhələdə başqa bir yük növü ilə təşkil olunması da mümkündür.
Vacib hallardan biri də odur ki, bu qədər böyük miqdarda narkotik vasitələr, istər tranzit, istərsə də son təyinat məqsədi ilə, heç bir nüfuzlu himayə olmadan Ermənistana gələ bilməzdi. Və burada himayədarların kimlərdən ibarət olduğunu, onların nə vaxtdan bu bizneslə məşğul olduqlarını, keçmişdə, məsələn, banan vasitəsilə, indiki kimi idxalın olub-olmamasını araşdırmaq lazımdır. Bu kontekstdə, məsələn, Ermənistanda banan idxalının uzun illər praktiki olaraq inhisarda olduğunu və bu gün Ermənistanda müxtəlif ittihamlarla mühakimə olunan Serj Sarkisyanın partiyasının odioz fiqurlarından birinə məxsus olduğunu xatırlamaq bəlkə də yersiz olmazdı.
Onu da xatırladaq ki, Ermənistanda hələ 2016-cı ildə hakimiyyət dəyişdikdə və Ovik Abramyan Karen Karapetyanla əvəzlənəndə banan monopoliyasına qarşı mübarizədə müəyyən hadisələr baş verirdi.
Təbii ki, italyanların kəşfini Ermənistanın banan bazarı ilə əlaqələndirmək üçün heç bir səbəb yoxdur, lakin banan paketlərində kokainin böyük idxalı Ermənistanda banan bazarı ətrafında yaranmış çılğınlığı təzələyir. Üstəlik, Ermənistanda narkotik dövriyyəsinin artması, ondan irəli gələn çoxsaylı təhlükələr və problemlər də göz qabağındadır. Rəsmi məlumata görə, Ermənistanda narkotiklərlə bağlı qeydə alınan cinayətlərin sayı 2016-cı ildə 1088 hadisə, 2017-ci ildə 1271 hadisə, 2018-ci ildə 877 hadisə, 2019-cu ildə 1088 hadisə, 2020-ci ildə 1226 hadisə, 2021-ci ildə 1544 hadisə, 2022-ci ildə isə 2268 hadisə olub.
Bütün hallarda bir şey danılmazdır: marşrutun erməni himayədarının kim olduğu aşkarlanmalıdır, çünki yalnız (miqyas baxımından) Ermənistana deyil, regiona da 3 ton narkotik gətirilməyə cəhd edilib. Bu, regionun təhlükəsizliyini bir sıra yollarla təhdid edən ciddi problemdir. Söhbət 250 milyon avro dəyərində yükdən gedir. Regionu narkotiklərlə doldurmaq, onu qlobal narkobiznesin geniş miqyaslı şəbəkələri ilə ört-basdır etmək ictimai səhiyyə və təhlükəsizliyə çoxtərəfli təxribatdır.
Aqil Məmmədov
Ordu.az
