Təxminən 5 gün əvvəl Rusiyanın 2 ədəd "Su-27" qırıcısı Qara dəniz üzərində ABŞ-a məxsus MQ-9 "Reaper" PUA-sının qarşısını alıb. Krım yarımadası yaxınlığında "Reaper"in üzərinə yanacaq tökən Su-27-lər PUA-nın mühərrik pərvanəsinə dəyib və "Reaper" Qara dənizə düşüb.

Bu dəfə oxşar hadisə Ukraynaya məxsus "Bayraktar TB2" PUA-sının başına gəlib. Yenə Krım yarımadası yaxınlığında baş verən hadisədə Rusiyaya məxsus döyüş təyyarəsi 20.000 fut yüksəklikdə "Bayraktar TB2"nin yaxınlığından yüksək sürətlə keçərək PUA-nı "jet wash" effektinə məruz qoymağa çalışıb. Əvvəlcə bir az yellənən "Bayraktar TB2" qısa müddətdə özünə gələrək uçuşunu davam etdirib.

Hadisə "Bayraktar TB2"nin quyruq kamerası tərəfindən anbaan lentə alınıb. Rusiya təyyarəsinin "Su-27" olduğu ehtimal edilir.

Rus döyüş təyyarəsinin "Bayraktar TB2"yə qarşı nə üçün "hava-hava" raketlərindən istifadə etmədiyi məlum deyil.


Sevinc Əliyeva
Ordu.az