Hazırda Polşa Ukraynanı məlum olan ən çox döyüş tankı ilə təmin edən Avropa ölkəsidir. Bu çərçivədə indiyədək Polşa Silahlı Qüvvələrinin inventarından 290 ədəd T-72A/T-72M/T-72M1R tankı Ukraynaya çatdırılıb.

PT-91 “Twardy” əsas döyüş tankı

PT-91 “Twardy” Polşanın əsas döyüş tankıdır. Bu, T-72 tankının performansını və imkanlarını artırmaq üçün bir neçə dəfə modifikasiya edilmiş sovet lisenziyalı bir modeldir. Modifikasiyalara yeni atəşə nəzarət sistemi, artırılmış zireh və daha güclü mühərrik daxildir. PT-91 tankı 1995-ci ildə Polşa Silahlı Qüvvələri tərəfindən istifadəyə verilib və bu gün də istifadə olunur.


PT-91 “Twardy”nin dizaynı sovet istehsalı olan tankları xatırladır, qabaqda sürücü bölməsi, ortada komandir və atıcı, arxada qüllə və mühərrik var. Tank gövdə və qüllədə Polşa tərəfindən hazırlanmış ERAWA-1 (içərisində bir qat partlayıcı ilə) və ERAWA-2 (iki qat partlayıcı ilə) tipli partlayıcı reaktiv zirehlə təchiz edilib.

Zireh paketi 7.62, 12.7 və 14.5 mm çaplı atıcı silahlardan və 20-30 mm-lik artilleriya qurğularından qorunma təmin edir. PT-91 “Twardy” yüksək partlayıcı, zirehdələn və tank əleyhinə idarə olunan raketlər də daxil olmaqla müxtəlif növ sursatları atəşə tuta bilən 125 mm-lik hamar lüləli silahla təchiz olunub. O, həmçinin 7,62 mm-lik koaksial pulemyota və 12,7 mm-lik zenit pulemyotuna malikdir.

PT-91 "Twardy" 4 taktlı, çox yanacaqlı, kompressorlu, su ilə soyudulan S-12U dizel mühərriki ilə təchiz edilib, 2300 dövrədə 850 at gücü hasil edir, 7 irəli və 1 geri ötürməni təmin edən mexaniki sürətlər qutusuna malikdir. O, maksimum 650 km kreyser məsafəsi ilə ən çox 60 km/saat sürətlə hərəkət edə bilir.

Sevinc Əliyeva
Ordu.az