“Bayraktar TB2” Azərbaycana 2020-ci il Qarabağ müharibəsində Ermənistan ordusu üzərində böyük üstünlük qazandırdı. Bu silahın köməyi ilə Azərbaycan Ermənistanın hərbi bazalarını və maşınlarını aşkar edərək hədəfə alıb. Bu PUA-ların pərəstişkarları yalnız Avropa ilə məhdudlaşmır. İndi Afrika ölkələri də Türkiyədən “Bayraktar TB2” alınması üçün müqavilə imzalayır. Türkiyənin “Bayraktar TB2” sistemləri Amerika PUA-larından xeyli ucuzdur və Çin sistemlərindən daha etibarlıdır.

Hansı Afrika ölkələri “Bayraktar TB2” alır?

Bu yaxınlarda Qərbi Afrika ölkəsi Toqo “Bayraktar TB2” PUA-larının ilk partiyasını alıb. Toqo uzun müddətdir ki, qonşu Burkina Fasodan ekstremist qruplaşmaların sızmasını dayandırmaq üçün mübarizə aparır. Belə bir vəziyyətdə, indi bu PUA-nın köməyi ilə o, bütün ərazini izləmək üçün güclü bir “səma gözü” əldə edəcək. Həmçinin Toqo da bu PUA vasitəsilə müdaxilə edənlərə raketlərlə zərbə endirə biləcək. Bu ilin may ayında Niger Türkiyədən də 6 ədəd “Bayraktar TB2” alıb. PUA Saxara səhrasının cənubundakı Sahel bölgəsində və Çad gölü ətrafında üsyançı qruplara qarşı hərbi əməliyyatlar üçün istifadə olunacaq. Bu PUA-nın digər Afrika müştəriləri arasında Efiopiya, Mərakeş, Nigeriya, Cibuti və Tunis də var, Anqola da almaqda maraqlı olduğunu bildirib.

“Bayraktar TB2” PUA-sını istifadə edən ilk Afrika ölkəsi Liviyadır. Liviya bu PUA-dan 2019-cu ildə üsyançıları ələ keçirmək üçün geniş şəkildə istifadə edib. Afrika ölkələri Avropadan və ya Amerikadan bahalı döyüş təyyarələri alacaq qədər zəngin deyil. Belə bir vəziyyətdə bu türk silahlarının köməyi ilə hava güclərini artırırlar. Onlar bilirlər ki, bu PUA vasitəsilə düşmənləri izləməkdən başqa onlara hücum da edə bilərlər. Təkcə bununla bitmir, onların texniki xidməti və istismar xərcləri də istənilən döyüş təyyarəsindən xeyli aşağıdır. Türkiyə həmçinin həmin ölkələrə PUA-ları idarə etmək üçün təlimlər verir.

16 ölkə bu PUA-nı almağa çalışır

Türkiyənin “Bayraktar TB2 PUA-sı dünyanın 14 ölkəsi tərəfindən istismar olunur. Türkiyədən bu PUA-nı almağa maraq göstərən 16 ölkə var. Bu PUA Türkiyənin “Baykar” firması tərəfindən hazırlanıb. Türkiyənin “Bayraktar TB2”si yüngül silahlanıb. O, dörd lazerlə idarə olunan raketlə təchiz edilə bilər. Radio yönləndirilməsi sayəsində bu PUA 320 km məsafədə idarə oluna bilir.

Dəyanət Ağalarlı
Ordu.az